Re∙baenggipa January 15 oni 20 tarikona Tura songjinmao 5 gipa Meghalaya Games ko sokachakanio India a∙songni President Droupadi Murmu Tura ona re∙bae kal∙aniko oprake on∙anggen. Apsan daken Murmu January ni 16 tariko Shillong songjinmaonaba re∙ange nieaniko dakangjolgen ine u∙isonagita man∙aha.
Ia Meghalaya Games o sak 3,000 mangnigita kal·na gisik nanggipa chadamberang ming 22 kal∙susaanirango bakko ra∙anggen. Unbaksana skanggipa changna Khasi, Jaintia aro Garo jatrangni kal∙susaanirangkoba bako donate kal∙atanggen. Tura o ong∙atenggipa aro sokachaknagita a∙dok sorkari chu∙gimik gong 23 crore tangka paisarangko chamataniko dakaha.
Una agreba Meghalaya Games 2024 na anthem ba mongsonggipa git “Here We Play” ko Shillong ni Summersalt aro Tura ni Nokpante dolrang apsan bakrime tariangaha. Ia git o dingtang mancha kal∙susagiparangni ku∙cholsan ong∙e bakrimanio pangchake English, Khasi, Garo aro Pnar ku∙sikchi ring∙angaha.
