A·chik Holistic Awakening Movement (AHAM) Adokgre Regional Unit aro Adokgre ni wilwilao songdongenggipa manderang Ildek A·kongo rikenggipa RCC dolongko galchipe donanina aro Adokgre oni Mangsang ona re·gipa ramako indita bilsina matchotgija donchipanina uamangni suk ong·gijaniko parakate CM na chitti sedoataha.
Adokgre oni Mangsang ona songrenagita Ildek A·kongo rikenggipa dolong ge·sa gamchatbegipa rama ong·a aro ia dolongko 2019 bilsionin sorkarinigita rikna a·bachengatgenchimoba da·alona kingkingba kamrangko matchotatna man·kujaenga ine AHAM dolrang japanataha. Kamrangni dontonganiko nike AHAM dolrang RTI ko ka·anio, ia project na gong crore 12 tangka paisarangko chamatahachim ine u·inagita man·aha. Indake ong·genchimoba ia dolongko sorkari galchipe donaniona maikai sokaha ine uamang sing·doaniko dakangaha. Ia dolongna chamatgipa chu·gimik tangkarangko gipin kamrangna jakkalsretgija kakket ong·e jakkalna nanga ine sorkari ko didiatangaha.
Apsan daken Adokgre oni Mangsang ona tarigipa ramana 2017 bislio gong crore 210 chamatgenchimoba, gong crore 123 ona tang·onataha ineba AHAM dolrang u·iatangaha. Ia project Garo Hills gimiko dal·batgipa projectrangoni mingsa ong·genchimoba indake tangka paisarangko chu·gimik jakkalgijaniko ra·chakna man·gijagipa kam ong·a ineba aganangaha. Bon·kame uamang a·dokni skotong Minister Conrad K Sangma aro Cabinet Minister rangko ia kamrangni bidingo nirokatchinagita aro chu·gimik chamatgipa tangka paisarangko jakkale kamrangko matchotatchinagita didiatangaha.
