A·dokni dingtang dingtang bakrango sorkarini chalaienggipa LP skulrango skinagita seokako man·e an·tangni kamtangko ka·gija gipinko niamgri kam ka·nagita watenggipa skigiparangni kosako raka sastirangko on·gen ine Education Minister Rakkam Sangma mikrakataniko on·ataha. Indakgipa kamrangko ka·anichi an·tangni kamko dal·e ra·gijanisan ong·aigija, poraienggipa bi·sarangni skie ra·anikoba bon·chongdikatani ong·a ine Sangma aganangaha. Unbaksana skigiparangni name dake skiengama sikijaengako ma·sinagita, officer rangko skulrangchi watate nirok sandianiko dakanggen ineba Sangma aganangaha.
Indake niamgri seoke skienggipa manderangko rim·a man·ani bidingo sing·anina, kragipa sakkirang baksa rim·ako man·genchimode sorkari raka ja·kurangko de·anggen ine Sangma aganangaha. Una agreba je skigiparang an·tangtangni kamtangko ka·na gisiko nangjagenchimode Voluntary Retirement Scheme (VRS) ko ra·e kamko watangchinagitaba u·iatangaha. Sangmani agananigitade a·dokni a·ja gimikon indakgipa obostarang ong·enga ine u·inagita man·angaha. Iani bidingo ru·utgija somoini gisepo tom·e chanchirimaniko dakanggen aro skigiparang uamangna tikatgimin kamrangko bimchipe ka·engama ka·jaenganiko nirok sandichinagita DC aro department ni officer rangkoba didiangaha ine Sangma parakataha.
Sangma an·tangni ja sni na Minister ong·e jako ra·e kamko ka·anio adita neng·nikanirangko chagrongenga aro primary oni chubata gadangona namdapatanirang dongkuenga ine janape aganangaha. Indakgipa obostarangko chagrongengani gisepon skigiparang kamtangko bimchipe ka·na nanga aro dormahana mangmangsan kamko ka·na nangja maina uamangni bimchipe skianichisa a·dokni pilak poraienggipa bi·sarangko ra·donagita man·gen ine Sangma didiangaha.
