January 15, 2024 tariko a·songni President Droupadi Murmu ni Turaona re·baani somoio VVIP rangni gari gorarang bang·bee re·bana miksongani a·selo, Tura songjinma aro Turaona re·gipa ramarango manderangna adita neng·nikanirangko chagrongangnaba donga ine Tura ni SP Abraham T. Sangma u·iataniko on·ataha. Unbaksana Tura songjinmaona aro Turaona dakanggipa ramarangko nangchongmotana agre jakkaljachina mol·molatjolaha.
VVIP rangni January 15 tariko re·baani somoio, gimik pekwatgipa ramarango gari gorarangko kontasana dontongatgen aro VVIP rang sokbana konta 24 na skang aro uamangni re·angpilaona kingking dal·dalgipa gari truck rangko napna aro re·rurana on·jawa. Una agreba ia jani 15 ba 16 tarikrango, South West Garo Hills a·jarangoni Guwahati aro Shillong rangchi re·na nanggenchimode Tura ramagita re·gija AMPT ramako jakkalchina aro South Garo Hills a·jarangoni manderang Siju, Rongjeng ramarangko jakkalskachinaba u·iatangaha. Bon·kame 15 pringoni 16 attamona ramasamrango gari gorarangko neng·take donjachinagitaba u·iataniko dakataha.
