5 gipa Meghalaya Games me·asa dolrangni Basketball kal·susaaniko da·al pringni bako, Don Bosco College Basketball kal·chakram biapo, skanggipa West Garo Hills baksa East Jaintia Hills mikkangchakgrike susaaniko dakangaha.
Ia dolgnini gisepgriko susaanio skanggipa neng·takani somoi ong·na skang, West Garo Hills 23 pointko aro East Jaintia Hills 15 point rangko man·angaha. Indake kal·susaani chu·gimik somoio, EJH 42 point rangko man·aha jeon WGH 57 point rangko man·skae EJH ni kosako chenagita man·angaha.
Apsan daken South West Garo Hills aro West Jaintia Hills dolrangni kal·ani gisepo chu·gimik somoio WJH dolrang 79 point rangko man·e cheaha. SWGH dolrang 49 point rangkosan man·e siriknagita nangaha.
