Pa Togan Nengminja Athletics Stadium o kal·susaanirangko da·al saloni a·bachengatanio, dingtang dingtang kal∙susaanirango susagiparang bak ra·ange chegipa ong·anirangko nikangna man·angaha. Ia stadium o kal·susaanio, 100 m me·asa dolrangni katsusaanio WJH ni Renaldi Dhar ta·rakbate katna man∙e 11.5 secs somoio soke skanggipani biapko man·angaha. SWGH ni Gracewin Ch. Marak 11.6 secs o sokskae gnigipa biapko man·aha aro Ri-Bhoi ni Pilo Ronghang gittamgipa biapko man·angskaaha. Apsan daken me·chik dolrangni 100 m katsusaanio, EKH ni Angelina Jackson 13.6 secs somoio soke skanggipa ong·aha. WKH ni Saviinity Jyndiang jean 14.2 secs o soke gnigipa biapko man·aha aro gittamgipako SWKH ni Ibaiahun Kurbah man·angskaaha.
1500 m me·asa dolrangni katsusaanio Ri-Bhoi, WJH, EJH aro WKH ni gisepgrikosa mongsongbate susaani ong·angaha jeon Ri-Bhoi ni Skhemlang Suba 4:04:7 secs somoio soke skanggipani biapko man·angaha. Gnigipa biapo WJH ni Dabit Dkhar aro gittamgipa biapko EJH ni Banjoplang Wanniang man·angskaaha. Me·chik dolrangni 1500 m susaanio, EKH ni Glorify Kurbah 5:04:1 secs ni somoio soke skanggipani biapko man·angaha. Gnigipani biapko SWKH ni Daplin Wahlang aro gittamgipani biapko SWKH ni Balasiewdor Pathaw man·angskaaha.
Me·asa aro me·chik dolrangni High Jump kal·susaanio, Ri-bhoi ni namgipa susagiparang baksa Garo Hills ni adita susagiparang bil·tinggrike susaangaha jeon me·asa dolni kal·susaanio Ri-Bhoi ni Primus Ronghi 1.9 m chuako bilbatna man·e skanggipani biapko man·angaha. Gnigipa biapko EGH ni Pringchang Sangma aro gittamgini biapko NGH ni Simeon Marak man·angskaaha. Me·chik dolrangoni Ri-Bhoi ni Rinalis Ingti 1.55 m chuako bilbatna man·e skanggipa biapko man·angaha. Gnigipa biapkoba Ri-Bhoi dolonin Andrisha Klein aro gittamgipa biapko EGH ni Roshni Ch. Marak man·angskaaha.
