5 gipa Meghalaya Games ko Tura, P.A. Sangma Sports Complex o re∙anggipa January ni 15 tariko a∙bachengate mijal attamni bako bon∙chote manianiko dakangaha. Ia manianio a∙dokni dam 12 a∙jarangoni susagiparang bakrangko ra∙e ge 23 sports ni a∙bao susagrikaniko dakangan baksana sak 3000 mangnigita kal∙susagiparang bakko ra∙angtokaha.
A∙dokni Chief Minister Conrad K Sangma mongsonggipa sokgipa ong∙e ia maniani bon∙kamgipa salo uni namgipa ku∙pattianirangko on∙angaha. Una agreba adita dilgiparang jekai Sports & Youth Affairs ni Minister Shakliar Warjri, Health & Family Welfare ni Minister M Ampareen Lyngdoh, Sports & Youth Affairs ni Commissioner & Secretary Dr. Vijay Kumar D, Meghalaya State Olympic Association (MSOA) ni Working President Shri John F. Kharshiing, MSOA ni Organizing Secretary Finely L Pariat, aro gipin MLA aro MDC rangba bakko ra∙angtokaha. Ia 5 gipa Meghalaya Games ko a∙songni President Droupadi Murmu January ni 15 tariko oprake on∙anikoba nikangnagita man∙angaha.
Ia susagrikanio East Khasi Hills 132 gold, 105 silver aro 122 bronze rangko man∙e chu∙gimik 359 medalrangko man∙ange chegipa ong∙angaha. Gnigipa gadango Ri-Bhoi ge 79 medalrangko man∙angaha aro gittamgipa biapko West Jaintia Hills chu∙gimik 68 medalrangko man∙e ong∙angskaaha. Meghalaya Games ni gisepo ian skanggipa changna a∙songni President re∙bae bakko ra∙an baksana oprake on∙anikoba niknagita man∙aha. Unbaksana Garo Hills aro Turao skanggipa changna ia Games ko sokachaknagitaba man∙aha jeon bang∙bate kal∙susagiparangni bak ra∙anikoba niknagita man∙aha. Ia bon∙kamgipa salo adita dakmesokanirangko nikangna man∙aha jeon jatgittamni chrokmesaani, Garo Hills ni Do∙Kakku Art & Cultural Association ni ka∙srokbee rimchaksoani git ringaniko aro dingtang dingtang dakmesokanirangkoba niknagita man∙angaha.
Ia an∙saobegipa programko name dake matchotatna man∙ani gimin Chief Minister Conrad Sangma pilak jako ra∙e kam ka∙giparangna uni mittelpilskaaniko on∙angaha. Tura ni Don Bosco College, Durama College, BSF, Meghalaya Police ni 2nd Batallion aro dingtang dingtang sokachani biap aro a∙damrangko on∙giparangkoba mittelangaha. A∙songni President Droupadi Murmu ni jakchi ia programko oprakanina aro uko rimchaksona cholko man∙aninaba ua katchabee aganangaha.
Sorkari sports ni a∙bao aro a∙damrangko namdapatna rakbee kamrangko ka∙na miksongani gnang aro da∙o dongenggipa Pa Togan Nengminja Sangma Athletics Stadium, Indoor Hall Hawakhana, Don Bosco College Basketball Court, aro Rongkhon Swimming Pool rangko rikanian sorkarini bimchipaniko mesoka ine Sangma aganjolangaha. Ia dakgipa cholrangko aro a∙damrangko ra∙baanichisa a∙dokni chadamberang uamangni gisiko nangbee dakna skaniko aro uamangni changa sapaniko dingtanggipa gadangona tang∙doatna amgen ineba Sangma agananga. Unbaksana re∙baenggipa Meghalaya Games 2025 jean 6 gipa Meghalaya Games ko Jowai songjinmao ong∙atskagen ineba Chief Minister parakangaha.
