South Garo Hills Gasuapara block ni ning·o ong·gipa Wagebokgre aro Attabenga songo Rashtriya Madhyamik Shiksha Abhiyan (RMSA) Secondary School rikenggipako da·onaba matchotatgija galchipe donenga ine songni manderang aro sordarni u·iatanina AHAM dolrang ninagita re·angaha. Songni manderangni agananigitade, ia RMSA skulko rikna 2021 ba 2022 bilsio matchotatani ong·achim maina apsan block ni ning·o ong·gipa Telekali songoba RMSA skulko apsan bilsirangon rike, ru·uta somoirangna skangan matchotmanangaha ine u·iatangaha. Indake janapgimin song damgnio skulko matchote rike on·gijani aro ru·utatani a·selo skulko chalaina ba skichakna biaprang dongjaengani gimin neng·nikanirangko man·enga ine janapataha.
Indakgipa obostarangko chagrongengani a·selo AHAM dolrang mijal salni bako a·jani ADC, District Sub-Division Inspector (Primary Incharge), District School Education Officer (DSEO) aro a·jani DRDA project director ko grongenba matchotatgija ru·ute galchipe donenganiko ta·raken nirokatchinagita didiangaha. A∙jako nirokenggiparang AHAM dolni grongani ja∙mano nanggipa ja·kurangko de·e maini a·selo ru·utenga aro galchipenga am·sandie niroke skulko namdapatangna uamang ku·chakangaha ine parakataha. Una agreba iani bidingo kamrangko ka·jagenchimode mikkangchi rakbata ja·kurangko de·anggen ineba AHAM dolrang u·iatangaha.
