Batanggimin somoio Lokayukta ni am·sandianiko dakgipa officer rangko kragija aro niamni a·palo ra·galanina jegalaniko mesoknagita, Voice of People’s Party (VPP) dolrangni mande jinma baksa tom·dake dabianiko dakna tik ka·anganiko, Human Rights and Anti-Corruption Youth Power of India ni state working President Kingstone B Marak uni chakpaaniko parakataha. Meghalaya a·dokni mande ong·e, niam gri officer rangko ra·galanina aro tangka paisarangko jakkalsretani kamrangko gimaatna miksonge VPP dolni indakgipa kamrangni kosako ku·rang on·e ja·ku de·aniara a·dokna namgni ong·a aro sakantian iana chakpae ku·rang on·a nanga ine Marak janapangaha. Dingtang dingtang political dolrangni sorkarini department rango maming kamna choligija aro namgniko ra·bagipa manderangko rimnaparangni bidingoba VPP dolni jegale ja·ku de·na miksonganirang namgipa ong·a ineba Marak parakataha.
Batanggimin salrango NPP ni ku·wattimgipa H. M Shangpliang aro Deputy Chief Minister ni agananio, Lokayukta ni section 10(2), Lokayukta o am·sandianiko dakgipa officer rang sorkarinigitasa ong·na nanga ine aganangaha jeon Lokayuktani section 10(2) ko name niatgenchimode, a·dok sorkarini Additional Secretary ba apsan gadangni Director of Prosecution aro Director of Inquiry dongna nanga jekon sorkarini panel ona watatgipa bimungrangoniko Chairperson seokna nanga ine sea gnang. Unbaksana Lokayukta ni section 11(1) o, Somoi meliatna mangmang drae niamrangosan pangchakaigija, Prevention of Corruption Act, 1988 o ge·etagita manderangna dangdike on·giparangni dosio ga·akaniko a·bachenge am·sandianiko daknagita Inquiry wing ko Director of Inquiry rimnapna nanga jeon indakgipa somoirango am·sandianirangko dakna sorkari department ni officer rangko chu·ongagita tarie dona nanga ine niamo tik ka·a gnang ine aganangskaaha.
Kosako janapgimin section rango pangchake, section 10(2) o Lokayukta o maming dakeba retired ong·gimin mandeko Director of Prosecution aro Director of Inquiry dona man·ja aro kam ka·kuenggipa mandekosan donna man·aia ine niamo dongja. Section 11(1) o, Inquiry Wingko Lokayukta songa jeon indakgipa officer rangko department oniko sorkari tarisamsoe dona nanga aro retired officerrangko rakkina man·ja ingipa katta dongja ine Marak janapataha.
Bilsi gittamna tik ka·e dongimin sak 3 officer jemangkon ra·galahachim uamangoni retired IPS aro DIG jean a·dok sorkarini Additional Secretary ni gadangna komigijagipa Lokayukta ni Ex-Director of Inquiry and Prosecution of Meghalaya Jainal Rymmai ong·achim uamangna tik ka·gimin bilsi matchotgijan ra·galako man·aha. Ian Meghalaya a·dokni itihaso dongangaha jeon ra·galako man·gipa sak 3 officer rangni am·sandianiko dake kamna chamatgimin tangka paisarangko jakkalsreatnina NPP ni ong·enggipa MLA Sanjay Sangma ko dosi donga ine badi ka·angaha aro ua officer rangko ra·galaniko jegalna krachongmota ine Marak janapataha.
Indake niamgri sak 3 officer rangko ra·galaniara Lokayuktani article 311(2) aro adita service rule rangko pe·ani ong·a ineba janapangaha jeon am·sandianiko dakmiting somoio maming u·iatsoni gri rang·gitik ra·galataha ine Marak aganaha. Retired Judge BK Muhahary ni Lokayukta ni Chairman ong·miting somoi retired govt. officer FD Sangma ko a·dokni Director and Prosecution wing songani somoiode maming agananirang dongja ineba janapangaha. Ia officer rangko name dake lekka pancharangko nichengesa sorkari rimnapaniko dakanggenchimoba, da·o adita pa·sikanichi ra·galaniara niamni a·palo ong·a aro indake sorkarini sason ka·sretaniko ra·chakna man·gijani ong·a ine Marak parakataha.
