Lokayukta o dangdike on·enggipa officer rangko niamrango aro dakbewalrango pangchakesa kamo rimnapaha jedakode sorkarina maming koros nangdapjanagita kamrangko ka·angaha ine mijal salo skotong Minister Conrad Sangma aganangaha. Adita salrangna skang VPP dolrangni uni agangipa kattarangni kosako jegalaniko dake retired officer rangko ra·galaniko rimnapilchina jingjengatanganina, je manderangkon gital dake rimnapaniko dakangaha uamangko adita soimoirangnasan officialrang chu·ongjani giminsa sorkarinigita seokchengaha ine Sangma koborna parakataha.
Ia kamo Secretary ni gadang ba una batgipa gadangni officer kosa seokna nangani a·selo niamgitade retired officer rangkosa rimnapani ong·genchimoba uamangna betonko sorkarinigita dingtangmancha chamna nanggen aro ian sorkarina koros chapdapani ong·gen ine Sangma aganaha. Je mandean kamo dangdike on·kuenggipa officer ong·genchimode uamangna chamgimin on·rongbewal dormahakon on·agita man·a ineba Sangma agandapaha. Unbaksana Lokayukta o segatgimin niamrangko ja·rike, kragipa officer ba retired officer rangko kamo rimnapile uamangna dormaharangko on·a man·agita bilsisa atana batpile sorkarinigita jotton ka·e kamrangko ka·angenga ine Sangma janapangaha.
Indake a·dok sorkarini iani bidingo chanchirimna ku·monganina VPP dolrang jingjengataniko dontongataha jeon basako uamangko golporimna okamgen ine sing·anina, je somoioba re·bae gronge golpona man·aigen ine Sangma u·iatangaha.
