Mijal salni bako Cabinet Minister rang tom·e minggni nanggipa kamrangni bidingo chanchirimaniko dake ra·chakangaha. Skanggipao sorkarini kamna dingtang dingtang Department rango jekai Home (Police), Excise Registration Taxation & Stamp, Home Gaurds aro Civil Defence, Department of Prison & Correction Service, Forest aro Environment Department rango kamna rimnapnagita komibatgipa bilsioni badita dal·bata bilsiona ra·chaknagita chanchirimangaha, jedakode kosako janapgimin department rango dambe aro chasongni kri dingtang dingtang nangarangko kam kan·a man·agita tik ka·aniko cabinet ra·chakangaha.
Gnigipao Principal rules ni Meghalaya Financial Service 1989 o dongsogimin niamrango, dingtang dingtang Department rango adita niamrangko Office Memorandam (OM) rangko on·e somoini kri dingtangataniko dakangnagita tik ka·angaha. Ia dingtangataniko dakaniara Meghalaya Finance Service Rule o bakrimate apsan ong·atna aro niamrangko nambate jakkalangna man·agita chanchirime tik ka·angaha.
