Chief Minister ni Lokayukta ni bidingo agangipa kattarangna Human Rights & Anti Corruption Youth Power of India ni Working President Kingstone Bolwari aganchakatengon ua pilak politics nigita rakkigipa manderangko ra·galchina dabiangskaaha. Lokayukta o ra·galgipa officerrangko korosrangko nigrike kamoniko ra·galaha ong·ode politics nigita rakkigipa manderangni a·doko silroro namroroanina maiba gamchatani dongama uko agane on·skachina Sangma Chief Ministerko didiangaha.
Batanggimin chango RTI ka·o man·ako janape Garo Hills mangmangon sak 30 na batpile politics nigita rakkigipa manderang donga jemangan gitcham MLA, party o dilgiprang aro gipin kam ka·giparang gnang ine parakangaha. Uamangoni mitamrangara, Pinto G. Momin, Vice Chairman Eco-development society, gitcham MLA Abdul Saleh, Co-chairman Tourism (MTDC), Lamingstone K. Marak, Co-chairman MMDC Limited, Charming N. Sangma, Co-chairman Forest Development Corporation Meghalaya limited, Willness K. Marak, Vice Chairman, Forest Development Corporation Meghalaya limited, Dabo Marak, Vice Chairman Commercial industries Mawmluh Cherra Cement limited, gitcham Power Minister, James Pangsang K. Sangma Chairman Meghalaya Industrial Development Corporation, gitcham MLA Satto R. Marak, Co-chairman SGPI & MC aro Khasi Hills ni bang·a a·jarango dongkengkua ine janapangaha.
Iamangni gadangrang niatgenchimode A+ jean Cabinet Minister, A jean MLA, B aro C gazatted officer baksa apsangipa ong·a ine Sangma janapangaha. Iasan ong·aigija gitcham MLA rang pension rangko oke cha·ode, uamang changgni dake dormaharangko man·enga ine Sangma matnange aganangaha. Unbaksana MDA sorkarini ning·o Officer on Special Duty (OSD) rangko kamo rakkiani bidingo aganangengon mitamrang ranta ka·agri maming skia man·gijaparangba gnang aro iamang IAS ba gazetted officerni kamrangko ka·enga ine Sangma janapangaha. Iasan ong·aigija politics nigita rakkigipa mitam manderangde skia poraia grigiparang ong·a, jemangan dal·a dormaharangko aro sorkarini namgniko man·e dongenga. A·doko skia poraia donggipa chatro chatrirang aro changgipa sapgipa manderangde kam gri ong·e dongskaenga ine Sangma aganangaha.
Politics nigita dingtang dingtang kamrango rakkigiparangna bate kam gri dongenggiparangna kam bikotanio aro chu·ongagita bida donggiparangna cholrangko ra·bae on·china Sangma sorkariko didiangaha. Sorkarini tangkako simsake jakkalani kattako CM agangenchimoba Lokayukta ni officerrangko kamoni ra·gale, ia politics nigita rakkigipa manderangnade dormaharangko on·a man·kuenga ine Sangma aganangaha.
