Chang 75 gipa Republic Day ko Tura Matchakolgre L.P skul ni kal∙chakram biapo da∙al salo manianiko dakangaha. Ia manianiona a∙dokni Chief Minister Conrad Sangma mongsonggipa sokgipa ong∙e bakko ra∙angaha. Sangma ia maniani bako a∙dokna dingtang dingtang rika cho∙ani kamrangko chu∙sokatna man∙ani bidingo aganangaha. Unbaksana a∙dokna mikkangchi manderangna, rika cho∙anio, sports, sanna bannani, IT, tourism aro entrepreneurship ba bading chiwalani a∙bao namroroatna aro silroroatna kamrangko ka∙na miksonganirangko Sangma parakangjolaha.
Ia manianio Selsellani MLA Arbinstone Marak, WGH a∙jani DC Jagdish Chelani, SP Abraham T. Sangma, DIG C Venkata Subba Reddy aro a∙jani dingtang dingtang departmentni Officer-rang bakko ra∙angaha. Unbaksana Tura songjinmani dingtang dingtang skulni bi∙sarang, NCC, Scout & Guide ni chadamberang bakko ra∙e an∙tangtangni changa sapaniko adita dakmesokangaha.
Ia manianio a∙jani adita departmentni gita an∙tangtangni kamtangko bimchipe ka∙anina mittelpilskanagita Certificate of Appreciation rangko on∙angjolaha. Roderick D. Shira ni pora skiani gadango dingtang mancha dangdike on·anina una Lifetime Achievement Award ko on·angaha. Una agreba gipin baknigita Certificate ko man∙anggiparangara Tura circle PHE Dept. ni Head Asst. Lendith N. Sangma, AH & Vet. Dept. ni Vet. Asst. Pran Gobinda Saha, Medical Dept. ni Ningring M Sangma aro Crystone T Sangma, Social Welfare Dept. ni Chrisdy Myithaline A. Sangma aro Anna Mary A. Momin, MePDCL Dept. ni Lineman Bijoy Joshi Aro Wisefield D Marak, Hoticulture Dept. ni Willen Ch. Marak aro Uttam R. Marak, SP Office ni LDA Ankur Newar aro Jesse Ch. Sangma, Tura Govt. Girls Higher Sec. School ni Bidalling Airo A. Sangma, Sericulture Office ni Marsyldha K. Sangma aro Mellorious Ch. Marak, Handloom Office ni Sulata Hajong, DC Office (Rev Branch) ni Damseng R. Sangma aro Tenny Bonshen R. Marak ong∙a. Tableau presentation dakanio skanggipa biapko Tura Municipal Board, gniggipa biapko District Commerce & Industries Centre aro gittamgipa biapko District Election Office man∙angskaaha. Unbaksana PHE Dept. nigita Water Sanitation Award ko Kama Galwanggre, Babadam aro Dadenggre songrang man∙angskaaha.
Una agreba ia tom∙anio dingtang dingtang dakmesokanio bakko ra∙giparangni gisepo nambate dakgipa dolrangnaba boksisrangko on∙angaha. Cultural Dance susaanio skanggipa biapko Tura Public School, gnigipa biapo Capt. Williamson Sangma School aro gittamgipa biapko Do∙kakku Cultural Club man∙angaha. March past ka∙anio Guide ba me·chik dolko Gumi Christine Sangma ni dilanichi aro Scout ba me∙asa dolko Nikjagring Ch. Marak ni dilanichi nambate dakmesokgipa ong∙angaha. NCC me·chik dolnigita Vercime M. Sangma ni dilanichi Tura Govt. College aro me∙asa dolko Alfredo Ch. Marak ni dilanichi Don Bosco College man∙angskaaha.
Apsan daken Garo Hills ni gipin a∙jarang aro Civil Sub-Division rangoba ia Republic Day ni bilsi 75 gapaniko a∙dokni Minister aro MLA rang bakko ra∙e manidilangaha.
