Rongjeng Model Degree College ko rika cho·anirango kam ka·anirang namgijanina, batanggimin somoio niroke kamrangko ka·atchina memorandumko on·anio pangchake changsatai Rongjeng Regional Unit ni A·chik Holistic Awakening Movement (AHAM) dorlang Chief Minister Conrad Sangmana chitti see janapataiaha. Ia college ko Rakesh Newar jako ra·e contractor ni kamko ka·enga ineba u·iatangaha.
Ia college ko rika cho·anio, kamrangko ka·na changgijagiparangko ka·atani a·selo, me·asa aro me·chikrangni hostel gegnion rikgimin nokrangni bretanirangko niknagita man·enga aro collegeko chalaina a·bachengatna skangan sakantini naljokanina nirokatpachina janapangaha. Ia obostani bidingo Meghalaya Legislative Assembly ni Public Accounts Committee (PAC) baksana adita Minister aro a·dokni officialrang biapona re·ange nieaniko dake jako ra·enggipa contractorni kosako kraa ja·kurangko de·china AHAM dolrang didiangaha. Unbaksana rika cho·anirango adita nanganirangara college ona re·gipa rama dongjanina aro chirang sokujaenganinaba janapangaha.
Minggipinara Dambo Rongjeng Development Block ni ning·o ga·akgipa, Dambo Rongjeng songni manderangni adita neng·nikanirangko chagrongenganina jekai LP skul, UP skul, SSA skul, Anganwadi, PMGSY ni tarigipa rama, BPL (Below proverty line) Swach Bharat Mission, Primary Health Sub-Centre aro JJM scheme nigita matchotgija donenggipako ta·rake nirokatpachina East Garo Hills ni Deputy Commissioner na chittiko seate AHAM dolrang mol·molataha. Uasan ong·aigija Dambo Rongjengo donggipa skulrangni skigiparangni skulona giseposan reba·e skianina, skul nokni nokkingrangni nosto ong·e wachini somoio mikka chirang sele neng·nikanirangko chagrongenganina, me·a aro mechik rangna dingtang dingtang paikanarang dongjanina, asongchakani choki, table aro blackboard rang chu·ongjanina, skul nokna bijoli sringani dongjanina, skulo pangkarang dongjanina aro JJM scheme nigita skul aro Anganwadi rangna chirangko sokatani dongijanirangkoba janapangjolaha.
Una agreba batanggimin January 13 tariko Shallangoni Dudhnoi ona gari sale cha·gipa Udoy M. Sangma ko ma·sina man·gijagipa sak 5 manderang NGH Medima Upper Rongbu songo so·ote galangahanina, so·otako man·gipa mandeni nokdangna sorkarini dongimin niamgita grant ex gratia ba tangka paisani gita dakchakaniko on·chinaba AHAM dolrang Chief Minister Conrad Sangma na chitti se·e mol·molaniko dakangaha.