Williamnagar songjinmao gital rikgipa Academic Block, Williamnagar Govt. College ni me·a aro me·chikrangni hostel, chongipa kal·chakram aro Entrepreneurship Promotion Development program ni ning·o rikgimin Entrepreneurship Cell ko da·al salni bako skotong Minister Conrad Sangma ni jakchi oprake on·angaha. Ia program o PHE Minister Marcuise N. Marak, Education Minister Rakkam Sangma, Rongjeng ni MLA Jim M. Sangma, Amlarem ni MLA Lakhmen Rymbui, Chief Secretary D P Wahlang, Education department aro district administration officialrangba dongpae bakko ra·angaha.
Williamnagar Collegeo skichakram nokrangko rikna batanggimin 2008 bilsion sianggipa P A. Sangma aro Donkupar Roy ni sorkariko chalaiengmiting somoion miksongani dongmanahaoba tangka paisanigita chu·ongjae dontongna nangaha ine Conrad Sangma janapangaha. 2018 bilsio a·dokni dingtang dingtang bakrango skie ra·chakram nokrangko nambate rika cho∙aniko daknagita gong 500 crore rangna bate jakkale, dao ia gitalgipa skichakramko aro chatro chatrirangni hostel ko matchotatna man·aniara namgipa chu·sokani ong·a ine Sangma aganangaha.
Skia poraiani gadangkosan namataigija a·dokni chadamberangna kamrangko on·a aro salantio janggi tangna sorkarinigita ra·dona adita on·enggipa project rang jekai Prime Entrepreneurship, YESS Meghalaya, CM Elevate, Meghalaya Games, Grassroots Music project aro gipin dake cha·ani cholrangko ra·bae on·anikoba Sangma janape aganangaha. Apsandaken MLA rangni janapgimingita Williamnagar aro Resu songjinmarango mikkangchi Meghalaya Games ni kal·anirangko sokachaknagita Mini stadium aro Track & Field rangko riknagitaba Sangma ku·chakangjolaha.
