Re∙anggipa February ni 3 tariko FKJGP Tura dolnigita tom∙bimonganiko dake North Garo Hills ni FKJGP Bajengdoba Circle ni kam ka∙anirangko dontongatna tik ka∙angaha ine FKJGP Garo Hills Zone ni Matsrang A. Sangma koborna u∙iatangaha. Ia dongtongatna tik ka∙aniko uamangni bilsisana batpile kamtangko daito-o ra∙gijani donaniko nike ia ja·kuko de·na nangaona sokaha ine ua parakataha.
Bajengdoba Circle ni kam ka∙anirangko February 8 tarik dipet dontongataniko dakangenga jekon dilgiparang mikkangchi chanchirimaniko dakangja dipet a·bachengatani dongjawa ine u∙iatangaha. Je kamrangko ra∙enggipa manderang ia u∙iatani kosako ja∙kurangko de∙genchimoba FKJGP dolnigita maming dakeba jako ra∙angjawa ine Sangma aganangaha.
