West Garo Hills a·jao PMGSY rama tarigimin chong·motan Babadam antioni Buripara ona aro Babadamoni Baluparaona dakanggipa ra·mako kraa bewalo ka·gija matchote donanganina GSMC H.Q Turani, Assistant Environment Secretary Silbath A. Sangma matnangate taritaie on·pilchinagita mol·molataha. Ia ramarangko dikdiksa somoirangnasan bainagita tariangaha aro nanggipa bosturangko on·gija tarigilonge donangaha jean wachi kario nosto ong·na altubegen ine Sangma koborna parakataha.
Ia biapo ABDK Sobhako pangna bilsian skotong ong·e manirongengani gimin ia ramarang namen gamchatbegipa ong·a aro baikamgipa ong·nagita name tarie on·a nanga ine Sangma janapataha. Mikkangchi Babadam songni manderangna ia sorok ru·uta bilsirangna baikamgipa ong·na man·agita nirokatpachina ua Babadam jolni manderangni palo mol·molataha. Iani bidingo maming nipilani dongjagenchimode niamo pangchake raka ja·kurangko de·na nangao ga·akgen ine Sangma parakataha.
