Da·al salni bako Micro, Small and Medium Enterprises (MSMEs) ni bidingo Shillong ni Reserve Bank of India (RBI), West Garo Hills a·jani Tura Polo Orchid Hotelo Town Hall meetingko ong·atangaha.
MSME ni gimin Town Hall meetingko ong·atani namgnirangni bidingo Shillong RBI ni General Manager Olden Nongpluh ia tom·anio agantalate on·angaha. Town Hall meetingara bading chiwalgipa, bank-o kam ka·gipa aro sorkarini kamko ka·giparangna apsan nangrime kamko ka∙nagita cholko on·gipa ong·a ine ua aganangaha. Unbaksana indakgipa tom∙anirangko ong∙atanichi MSME ni bidingo ma∙sie ra∙nagita aro apsan bakrime namgnirangko man∙agita dakchakani ong·a ineba Nongpluh aganangaha.
A·jani DC Jagdish Chelani mongsonggipa sokgipa ong·e, RBI Shillong ni MSME ni indakgipa ja∙kurangko de·e saksa sakgipin baksa meli nangrimate apsan ong·e kamko ka∙na man·agita cholko on·anina mittelpilskaani kattarangko aganangaha. Apsan daken bank rangni officerrangba ia tom∙anio dongpae MSME ni namgnirangna maikai RBI aro sorkarini dingtang dingtang ja∙kurangko de·ani bidingoba aganatalate on·angaha.
Ia tom·anio MSME ni sak 100 entrepreneur rang bakko ra·angaha aro uamangni bading chiwalani a∙bao maikai chu∙sokna man∙ani bidingo, da∙o a∙bachengbaenggipa gital entrepreneur rangna parakange didianiko on∙angaha. Una agreba seoka man∙gipa entrepreneur rangna dingtangmancha loan on∙agita adita crore ni tangkarangko chamatnagita lekkarangkoba sualangaha.
