Garo Hills Autonomous District Council (GHADC) o kam ka∙giparangna dormaharangko on∙agita man∙kujanina Non-Gazetted Employees Association (NGEA) ni dilgiparang re∙baenggipa antioni kamtangtangko done jingjengatna tik ka∙angaha. Indake ong·engon uamangni jingjengatna u∙iataniko man∙e GHADC ni dingtang dingtang department rangona tangka paisarangko chamatnagita budget session ko Sombar saloni ong∙atna tik ka∙angskaaha.
Da·onaba dormaharangko on∙kujaenganina budget session matchotako senge, minggipin ja∙kurangko de∙anggen ine NGEA u∙iatangaha. Ia ong∙enggipa obostarangara da∙o dilenggipa Executive Committee (EC) ni uamangni ku∙chakgimin kattarangko pe∙e chu∙sokatna man∙jani a∙sel ong∙enga ineba NGEA ni dilgiparang aganangaha.
GHADC ni kam ka∙giparangna ja 32 ni dormaharangko on∙a man∙kugijaoniko re∙anggipa December jao ja 2 ni dormaharangko uamangna on∙angaha. Unbaksana ia bilsini January jao uamangna ja 2 ni dormaharangko on∙a ku∙rachakgipani bidingo da∙ona kingkingba maming u∙iatpilaniko dakangjaha ineba u·iatangaha.
Ia jingjengatna am·engani bidingo chingna maming dakeba associationigita chitti rangko sokate u∙iataniko dakangjaha aro iani bidingo maming chanchirimaniko daknagitaba uamang chingona re∙bajaha ine GHADC ni CEM Albinush R. Marak aganchakatskaaha. Ia gitalgipa EC rikna a∙bachengaonin kam ka∙enggiparangna chinga ja 34 ni dormaharangko on∙agita man∙angaha indimangba da∙o bangki dongenggipa ja 30 ni dormaharang re∙anggipa EC rangni rikanio donanggimin ong∙ani gimin bang∙a neng∙nikaniranko ra∙baaha ine CEM agandapangaha.
