Batanggimin 2022 bilsini November 15 tariko oprake on·gimin NGH a·jani Adokgre C&RD block ko da·ona kingkingba chalaigija donchipenganina, jolni manderangni neng·nikaniko janapatan baksana Adokgre Regional Unit ni AHAM dolrang suk ong·gijaniko Chief Minister Conrad Sangma na chitti see u·iatangaha.
Adokgre damsa noksikgipa biap ong·a jeon song dam 43 mangna batpile gnang aro nokking 10,000 mangnigita dongan baksana bang·bata uno songdonggipa manderang BPL ni ning·o ga·akgiparang ong·a ine janapataha. Indake jolo songdongenggipa bang·bata manderangan game cha·giparang ong·e, Kharkutta block ona Assam gita km 30 mangko nanga kamna re·anggenchimoba Officer dongjagenchimode re·a doani korosrang indin ong·gramaia aro ian cholgri manderangna namen neng·nikani ong·enga ine u·iatangaha.
A·dok sorkarini C&RD block ko songe on·anichi jolo songdonggipa manderangni neng·nikanirangko olgrokatna ka·dongsoanirang indin ong·engaha aro bilsi sa batpilomangba da·onaba ia block ko chalaina a·bachengatkujaenganina songdonggipa manderangni palo AHAM dolrang suk ong·gijako parakataha.
Indake ong·engon obostarangko nirokate Adokgre aro wilwilao songdongenggipa manderangni namgnina aro silroro namroroanina MCS officer, APO ba dingtang dingtang kamrango dakchakgiparangko rimnape block office ko ta·rakkale chalaina a·bachengatpachinagita AHAM dolrang mol·molataha.
