A·dokni pilak hospitalrangni gisepo Tura Civil hospital, ka·tongni sabisiko sanna hi-tech Catheterization Lab ko ra·bana man·chenggiparangoni skanggipa ong·aha. Ia lab-ko jakkale Cardiologist ba ka·tongni sabisirangko sangipa doctorrangna nengrabee saknaatenggipa bosturangko be·enoniko bikotna, ka·tongo a·kol donge atchigipa bi·sarangko sanna aro be·eno nanggipa ostrorangko sikatna dakchakani ong·anggen.
Ia lab-ko a·bachengatanichi ka·tongni sabisiko man·enggipa nokdangna Shillong aro Guwahati re·e sannako toate korosrangni bidingo ritchengatgen. Ia lab ni bosturangko mingsingbegipa United State oni General Electric (GE) company-oniko ra·baaha aro ia chasong gitalni kolni damara chu·gimik gong crore 6 mang ong·a.
Indakgipa kolrang donganichi Garo Hills o manderangni janggirangko jokatna man·an baksana rang·gitik obosta ong·ani somoio namen dakchakani ong·anggen ine Interventional Cardiologist Dr. Jacob Abraham Ruram aganangaha. Ia lab-ko jakkale salo changdok mang operation-ko ka·na man·gen jeon ua an·tangan sangipa dolrangoni sakgni technician aro saksa nurse ni dakchakanichi a·bachenggen ine Dr. Jacob agandapangaha.
Ia labko ra·bae on·anina sorkariko mittelangan baksana ian sakantina dal·begipa chu·sokani ong·a ine Tura Civil hospital ni Superintendent Dr. Inbert C. Marak aganangaha. Ian Garo Hills o tangka paisanigita bilgrigiparangna gipin a·dokrangchi private hospitalo sanna neng·nikaniko man·giparangna name dakchakani ong·genok ine Marak aganangaha. Una agreba mikkangchi nangchongmotenggipa Magnetic Imaging Resonance (MRI) ka·ani kolrangko ru·utgijan ra·banasienga ine Dr. Marak agandapangaha.
