South West Khasi Hills, HQ Khonjoy joloni A·chik Holistic Awakening Movement (AHAM) dolrang adita nangenggipa aro neng·nikarangko janape da·al salo skotong Minister Conrad K. Sangma na memorandum-ko on·angaha.
Skanggipao Bangladesh a·songni sima arirango donggipa Khonjoy, Moheskola aro Bagli jolrango skichakram biaprang komiani a·sel gisik nanggipa chatro chatrirangna chubata gadango poraina champenganiko on·enga ine AHAM dolrang janapangaha. Bang·abata chadamberang gisiko nanggenchimoba ramarang chel·beani a·sel korosrangni bidingo neng·nikaniko man·e poraianiko dontongna nangaona sokenga. Ia jolrango chadamberangna namgni ong·china aro gimiknigita chu·gimik tang·doaniko ra·bana sorkari collegeko rike on·genchimode namen dakchakbeani ong·gen ine AHAM dolrang mol·molangaha.
Gnigipao, AHAM dolrang Khonjoy PHC ko CHC ona ra·doatchina mol·molaniko dakangaha. Ia wilwila jolni songrango songdongenggipa manderang jelbatroroanichi, Khonjoy PHC sanna bannanio nangani kri on·a aro PHC san ong·ani gimin bang·bata cholrangko sanna bannaniko dakna man·jaenga ine AHAM dolrang u·iatangaha. Ia PHC ko CHC ona ra·doatgenchimode nambata gadango sanna cholrangkosan on·aigija bang·bata manderangko sannaba dakchakani ong·anggen ine AHAM dolrang janapangaha.
Una agreba SWKH sima ari jolo ritchasana bate songrang gnang jerangan ge·a gamanio nambegenchimoba, an·tangtangni man·gipa me·su samjakrangko nama damrango palna man·jaenga ine AHAM dol janapataha. Ge·e game cha·giparangna kraa damrango pale sim·e cha·na aro bading chiwalaniko tang·doatna Bagli aro Moheskola songrango International market ko ra·bae on·chinaba AHAM dol mol·molangaha.
