GHADC o kam ka·giparangni ja 32 ni dormaharangko man·kujaenga ine da·al saloni jingjengataniko CEM Albinush Marak jegalan baksa uamangni man·kujaenggipa dormaharangara backlog rangsa ong·a ine aganangaha. 2021 bilsioni ia gital EC ko rikbachengaoni GHADC o kam ka∙giparangna dormaha on∙ani da∙ona ja 34 ong∙aha ine ua u∙iatangaha. Indake ong∙engon NGEA ni dilgiparangni uamangna dormaha on∙kuja ine matnanganiara maming dakeba kakketgipa ong∙ja ine CEM aganangskaaha.
Re∙anggipa EC ni GHADC o kam ka∙giparangna ja 32 ni dormaharangko on∙gijagipako da∙o dilenggipa EC apsan somoio backlog aro da∙o on∙enggipa dormaharangko on∙agita Council na rakbegipa kam ong∙a ine ua agandapangaha.
Da∙o rikenggipa EC ni GHADC o kam ka∙giparangni dormaharangko on∙chipgija donenga ine NGEA ni dilgiparangni agananiko ra∙chakna man∙ja aro uamangni EC rikchengaonin kam ka∙giparangna dormaharangko ja antian on∙baenga ine CEM aganangaha. Unbaksana NGEA ni mitam dilgiparangna nangchongmotgipa somoirango uamangni man·a nangkuenggipa ja 32 ni dormaharangko jagni ba jagittam mangniko a·sel obostako nigrike on·manaha ine CEM parakangaha. NGEA ni mitam dilgiparangde chu·gimik ja 37 ba 38 janiko dormaharangko ra·manaha jekon gimik kam ka·giparangnade tangka paisarang chu·ongjae on·a man·jaha ine CEM aganangaha.
Ia ja 32 ni dormaharangko ma·mong sorkarini tangka paisarangko nigrike cholrangko am·sandie on·a jotton ka·enga aro kajina man·aniko tang·dodapatna jinma apsan ku·monge kam ka·angenga ine CEM agandapangaha.
Unbaksana changni changna NGEA ni dilgiparangko golporime chanchirimna okamgenchimoba uamang bakrimna skaniko mesokjaha ineba aganangaha. NGEA ni indake jingjengataniara dingtang dingtang kamrangna manderangni Council ona re∙bagiparangna neng∙nikaniko ra∙baanisan ong∙aia ine CEM jegale aganangaha.
