Meghalaya Power Policy 2024 ko Cabinet tom·e chanchirimanio ra·chakanga

A·doko mikkangchi bijoliko bikotanio namdapatnagita jotton ka·engon, Meghalaya Power Policy 2024 na tangka paisarangko jakkaldapangkuna Cabinet tom·e chanchirimanio ra·chakangaha. Ia policy ni ning·ao saloniko aro chioniko bijoli bikotna agreba pumped storage project koba dakangna miksonganiko ra·chakangaha. Power Policy 2024 ni mongsonggipa miksonganiara a·doko jakkaltaitaina man·gipa cholrangchi nanggipa kamrangko bako ong·ate aro nambatgipa cholrangko jakkale chu·gimik tang·doaniko ra·baani ong·a.

Unbaksana ia policy ni apalbate miksonganiara State Power Trading Company ko a·bachengatna, bijoliko bikotanio jakkaltaitaina man·gipa cholrangko tang·doatna, chioniko, pumped storage oniko, saloniko, balwaoniko power project rangko a·bachengatna aro da·o jakkalenggipa power plant rangko namdapate chasongna jakkaltaitaina man·agita kamrangko ka·angna tik ka·angaha.