Beryl B. Sangma ni aganagita India a·songo chasongoni chasongona ma·chongoni man·rikrikbaenggipa politics-ara Meghalaya a·doko ong·baengagitan ong·a aro iako mikkangchi ja·pangoni kam ka·gipa dilgiparangna namgipa a·bako tarina dingtangatna nanga.
Ia bakrogipa Meghalayani political itihaso saksa dilgipani gamchatgipa on·gile ka·gimin kamrangko re·anggipa sal somoirango nikchangani dongaha. Garo Hills oni skanggipa Lok Sabha MP, Karnesh Marak, jean bilakani, chu·gimikani aro dontonggija manderangna dangdike on·aniko mesokna saksa sakki ong·a. A·dokni politics ko tarina ua bimchipe kam ka·ahaoba ma·chongoni ong·rikbaenggipa politics aro sorkarini nikchangani a·selo Marak saksa mingsing minggamgipa dilgipa ong·jaha.
A·bachengo janggi tangbaani aro skia poraiani
Karnesh Marak ding·begipa July pring 1920 bilsio Damra sepango donggipa Nokmakundi songo atchie North Garo Hills a·jao dal·baaha. Ua bi·san salrango skia poraianio matsramgipa aro kal·anirango changgipa sapgipa ong·angaha, ia cholon bewalrangan mikkangchi uni re·mikkanganiko mesokaha. Marak uni skulko Nisangramo poraiange, matric porikkako Guwahati Cotton College o matchotaha aro indake ua Garorangni gisepo skanggipa graduate ong·chenggipa ong·aha.
Uni kam ka·baani
Marak a·gilsako dal·begipa dakgrikani World War I o British army baksa kamko ka·angaha jeon uni namgipa bewal, bimchipani aro dilani gun gnanganichi Lieutenant ni gadangona sokdoangaha. Ua army o kam ka·ani ja·mano sorkarini kamko Deputy Inspector of School ni gadango ka·angskaaha.
Politics-o a·kangbaani
Marak-ni politics ona a·kanga gnang re·baanichi Meghalayani politics o dingtanganiko ra·baaha. Uni GHADC o Executive Member ong·ani aro joljol Garo Hills ni skanggipa MP ong·e susaanian uni mikkangchiko niksamsoe ja·panggipa gadango dilaniko aro bimchipaniko mesoka. Karnesh Marak bang·a neng·nikanirangko chagrongahaoba jolko tang·doatna aro manderangna dangdike on·a uni miksonganiko kim·kime kam ka·angaha.
Uko mande ra·ani
Chansokpilgija chu·sokanirangko Marak dakahaoba a·dok sorkari uni namgipa kamko mande ra·na nikchangaha. Uko mande ra·anigita uni bimangrangko tarina chu·sokgijaniara mikkang niteaniko mesoka. Meghalaya-ko a·dok man·ani bilsi 50 gapahaon Karnesh Marak ni a·dokna bimchipe dangdike on·aniko manina aro gisik ra·na nanga jean an·chingni ma·sianio gimana man·gijagiparang ong·a.
Marak-ni janggi tanganiko aro uni donanggimin gunrangko gisik ra·engon an·ching bang·a gualchanggipa matgrikrangko gisik ra·na jerangan manderangni namgnina kam ka·anichi chasongni chasongna didiataniko on·enga. An·ching politics o ong·enggiparangni gimin nipilangengon Marakni janggi tangao namgipa dakmesokani jean chu·gimikgipa, manderangna chanchigipa, songsalna aro a·songna dangdike on·aniko skie on·a. Karnesh Marak ko mande ra·anichi an·ching Meghalayani janggi silko gisik ra·ani ong·a aro mikkangchi jinmana apsan namgniko ra·bana dangdike on·aniko piltaie bilakatani ong·gen.
