South Garo Hills a·jao 200 Bn BSF sipairang aro pulis dolrangni bakrime am·sandianichi kanta 24 ni gisepo Bangladesh a·songchina badingsrukna donenggipa 33,000 kg mang chinirangko sima ari joloniko rim·na man·aha. Ia chinirangko Rongra songni nok ge·sao dankete donako kakketgipa koborrangko man·e am·sandianiko dake chu·sokna man·aha.
Apsandake Baghmara songjinma sepang jolo BSF ni nirokenggipa dolrang truck bolsako rim·na man·aha ine koborna parakataha. Koborna parakatanigitade ia trucko chinirangko salangenga ine u·iataha. BSF dolrangni uamangko dondikaton truckko salgipa aro gario gadopagipa saksa andalgipa biapo a·damoni kataha ine parakataha. Rim·a man·gipa bosturangko nambate sing·sandina pulis dolrangna pakwatanga.
