Tikrikilla branch SBI bank o accountant kamko ka·enggipani kosako bakrimgimin NGO dolrang uni kamrangko namnikjae Tura Regional Business Office-ni Assistant General Manager-na lekka sedoataha. Iani bidingo ASPF, NGCO, FKJGP, CSAWO, AAPE aro CEPARD dolrang apsan bakrime badi ka·doangaha. NGO dolrangni parakatanigitade ia accountant bank ona somoigita sokrongja aro bank-ona re·bagipa manderangko kragija bewalrango aganronga ine u·itangaha.
Jolni manderang account-rangko aadhaar baksa segatna ritingo chadenge senge dongon uamangko dakchakna accountant-ni jechakaniko nikronga aro kamrangko matchotatgija donronga ine parakataha. Una agreba ia bank o bang·bata changon tangka paisarangba dongrongja ine NGO dolrang parakataha.
Indake ong·genchimoba jolni Customer Service Point (CSP) ode tangkarang donganiko nikskaenga jekon NGO rang uamang bankoniko tangkarangko man·skaenga ine sing·doangaha. Unbaksana ia branch ni ATM bilsisana batpile nosto ong·e dongenga aro da·onaba taripilkujaenga jean manderangna bang·a neng·nikaniko on·enga ine NGO dolrang janapataha.
