Rongtal an∙talaniko rakkinagita aro ‘My City Campaign’ o bak ra∙agita, Tura Municipal Board (TMB) Tura songjinmani adita rama pekwatgipa biaprang jekai Araimile, Hawakhana, Ringrey, Chandmari aro Gandrak Dare ko mijal salo rongtalatangaha.
‘My City Campaign’ ara “Locality Beautification and Enhancement Competition” ni bak ong∙a jekon wilwilao donggipa biaprangko rongtale aro nitoe rakkina miksonge ra∙gatani ong∙a. A∙song gimiko Tura songjinmako rongtalbatsranggipa ong∙atna miksongani donge, a∙dokni Chief Minister ia campaign ko a∙bachengataha jekon songjinmao songdongenggipa manderangko rongtal an∙talaniko rakkianio apsan jak on∙e kamrangko ka∙na miksongangenga.
Ia campaign-nigita rongtal an∙talataniko dakna jagittam prako changprak ong∙atangna miksongenga. Kamrangko nambate ka∙na man∙agita jabol ra∙chakgipa garirangkoba Tura Municipal Board nigita watataha.
