Phidalia Toi, Meghalaya State Commission for Women (MSCW)-ni Chairperson-ni biapko watna adita somoirangna skang MSCW-ni ong∙atanggipa ‘Socio-Economic Status of Single Mothers’ jean National Commission for Women, New Delhi ni dakchakako man∙e ong∙atgipa seminar o, a∙doko segri ma∙giparang 13.5 per cent ni gita tang∙doaha ine aganangaha.
MSCW gitcham Chairperson Theilin Phanbuh-ni kam-o dongengmitingo NEHU-ni Anthropology department aro Martin Luther Christian University (MLCU)-ni Social Work department baksa nangrime survey ka∙e ma∙sina gita man∙aha. Kobor-rangko man∙ani jaman Toi Educationists, Sociologists aro NGO-rangko, me∙chikrangni bi∙sa donge segri ong∙ani aro bilsi chu∙onggija ma∙gipa ong∙ani ja∙pangrangko sandina didiataha aro ja∙pangko sandiesa ia obosatarangko namdapatna man∙gen ine aganangaha.
National Commission for Women-ni member Delina Khongdup ba iani bidingo aganangengon, jatni gitcham nama daka-rikanirangko gale saliram a∙songrangni daka-rikako chanchigija skatang ja∙rikani a∙selba indakgipa obostarang ong∙enga ine aganaha. An∙chingni ma∙a-pa, mama-ada aro mahari ma∙drang aro an∙chingni ma∙gitcham pagitchamrangni katta ko knachakgenchim ong∙ode ia obostarangko chagrongna nangjanaba dongachim. Segri ma∙giparangni simsakanio dal∙rorobaenggipa bi∙sarang gisikni gita neng∙nikanirang aro duk jajrenga rangni a∙sel namgija pekgipa bosturangko jakkalaona sokan baksa niamko pe∙ani aro dosi dakanionaba sokronga ineba ua agandapangaha.
Indian Institute of Public Health-ni Associate Professor Dr Melari Nongrum ni survey ka∙e u∙ie ra∙ani gita bang∙a ma∙giparangni segri ong∙e dongani a∙selra, setangtangni gale kattani gimin ong∙bata ine parakataha.
