South Garo Hills Khapasipara jolni Garo Student Union (GSU) dolrang, National Highway ramaoni uamangni songona dakanggipa PWD rama namjabeahani gimin an·tangtangni bil amadipet JCB garirangko okamate ramarangko tarie on·angaha.
Khapasipara song India aro Bangladesh-ni sima ari jolo ga·akani gimin NH ramaoni km 1 mangnigita re·na nanggipa rama ong·a. PWD department nigita ia ramako ru·uta bilsirangna nirok simsakaniko dakgija galchipe donengani a·selo ua jolo songdongenggipa manderangna aro chatro chartirang bang·a neng·nikanirangko chagrongna nangenganiko niknagita man·rongenga ine GSU dolrang janapataha. Ua songni manderang NH ramaona re·ruranagita ia rama dilsakosan jakalengani gimin wachi karirangni somoio namen neng·nikaniko man·rongbata ineba janapataha.
Indake songdongenggipa manderangni neng·nikanirangko nike GSU dolrang an·tangtangni bil amagita kamrangko niroke ka·e on·angaha aro mikkangchiba uamang dingtang dingtang songsalni neng·nirangko olgrokatnagita dangdike on·angkugen ineba aganangaha.
