KHADC mamlani bidingo UDP dolni ma∙ringaniko NPP dontongchina agana

UDP dolni ning∙joljol NPP ni kosako KHADC ni Executive Committee-ko be∙gruanio jak donga ine ding∙chaoanina, NPYF ni ku∙watimgipa aro MDC, Bajop Pyngrope, uamangko KHADC-o namgipa opposition ba bilake mikkangchakgipa dol ong∙e kam ka∙china aro uamangni amma cha∙aniko ra∙chake re∙mikkangchina aganangaha. NPP dol darangni kosakoba kragija kamko ka∙a dongja ine UDP ni matnangako jegalatenba, NPP dol single largest ba KHADC-o MDC bang∙batgipa dol ong∙esa Executive Committee-ko re∙dilenga ine UDP dolna aganchakatskaaha. KHADC o UDP dolchi re∙dilenggipa EC, bang∙bata nangchongmotgipa kamrangko saksa sakgni manderangchi a∙kange kam ka∙ani a∙selosa gipin dilgiparang namnikjae be∙gruna nangao ga∙akaha ine ua agandapangaha.