Da∙o re∙baenggipa April 19 o ong∙atna am∙enggipa Lok Sabha Election-na Election Commission (EC) nigita gimik Chief Electoral Officer (CEO) rangko bilsi 85 na batgipa aro be∙ennigita bilgrigiparangna dingtangmancha noktango pu∙ona man∙agita tarisamsochina ge∙etangaha.
Bilsi 85 na batgiparang aro be∙enni gita 40% bilgrigipa manderangna “vote-from-home” ba nokoni pu∙onagita cholko man∙gen. Una agreba buchuma budepa aro be∙ennigita bilgrigiparangna nengrae pu∙ona man∙agita pu∙onani biaprangko ka∙mabatgipa gadangrango tarie on∙china aro wheelchair-na ramako dingtangmancha tarinagitaba ge∙etangaha. Bilsi 80 na batgipa pu∙ongiparang sak 23,793 aro bilsi 85 na batgiparang sak 10,345 mangnigita donga. Unbaksana be∙ennigita bilgrigipa pu∙ongiparang chu∙gimik sak 11,179 donga.
Gimik pu∙ongipa biaprango ringani chi, sengchakani biap, ki∙chak su∙buchakani biap, chu∙ongagita bijoliko teng∙atani, be∙enigita bilgrigipa manderangna ramako tarina aro nambatgipa pu∙onchakgipa biaprangko name dake tarichinagita EC CEO rangko ge∙etangaha. Unbaksana jemangan wheelchairko nanggipa manderang Saksham ECI ni App o bimingrangko segate dona man∙gen aro buchuma budepa aro be∙ennigita bilgrigiparangna pu∙onanio nengraatnagita RO/DEO nigita don∙gimin volunteer-rang dakchakangen ine u∙iatangaha.
Mikronnigita bilgrigiparangna ba kanarangna ballot ni lekkako uamang ma∙sinagita chinrangko on∙gen aro 1961 Conduct of Election Rules ni Rule 49N o pangchake mikgri ba kanarangna pu∙onanio dakchaknagita rimbagipa mande uamangni palo pu∙ona man∙skagen.
