SWGH Rerapara C & RD Block ni ning·o donggipa Mellim PHC ni Dorambok Urban Health & Wellness Centre-o World Oral Health Day ko “A Happy Mouth is… A Happy Body” katta bichongo pangchake SWGH a·jani National Oral Health Programme ong·atangaha. Ia salko maniani bako District Medical and Health Officer, Dr. H Barman aro gipin MHO rang, Dorambok ni Nokma P T. Sangma, department o kam ka·enggiparang, Mellim PHC ni ning·o songdongenggipa manderang, chatro chatrirang aro skulo skigiparangba re·bae bakko ra·angaha.
Ia programo oral health ba ku·sikko rongtale rakkiani bidingo aro chu·gimik an·seng boljoke donganio dakna nanggnirangko talate on·aniko dakangaha jeon saksa sakgipinona batrikrikgipa sabisirangko, mikkron aro wagamni sabisirangko porikka ra·angan baksana sabisioni naljokna man·agita simsaksoani bosturangkoba sualangjolaha. Malaria sabisini bidingo talatani aro mikrakataniko Dr. Lydia Marak, District Malaria Officer aganangaha. Oral Health Programme ni Dental Surgeon & District Nodal Officer Dr. Cornellius R. Marak, be·en bimangko mangrake aro an·seng baljoke rakkianio oral health ni gamchatani bidingo aganangskaaha. Marak iako gamchate ra·china aro ranta ka·anirangko dakchina manderangko didiangaha.
Programni bako quiz, chroksusaani aro git ring·susaanirangkoba ong·atangaha jeon chegiparangna boksisrangkoba on·angaha.
