BJP ni ma·mongoni re·baenggipa Lok Sabha election o doltangoniko susana seokgija NPP ni candidate rangna chakpaaniko on·a ge·etanina BJP party ni adita dilgiparangni suk ong·gijaniko u·ina man·aha.
Ma·mongoni indakgipa ge·etako on·atanichi bang·a neng·nikanirang aro ra·chakna man·gija kattarang a·dokni BJP ni ning·o donggenchimoba an·tangtangni gisepon ia pilak ma·sisretaoni naljoknagita kamrangko ka·anggen ine party ni ku·wattimgipa Mariahom Kharkarang aganangaha.
NPP na uamangni chakpaaniko on·agita BJP ni dilgiparang NPP ni National President aro Chief Minister Conrad K. Sangma baksa gronganiko dakangaha. Iani bidingo NPP ni State President aro Deputy Chief Minister Prestone Tynsong mittelpilskaaniko on·an baksana BJP ni adita vote rangko man·dapanichi NPP na bilonggen dakchakani ong·anggen ine aganangaha.
Unbaksana NPP aro BJP a·doko aro ma·mongo apsan bakrime kam ka·ani gimin BJP ni chubatgipa gadangoni ge·etgiminko ja·rikna nangchongmotaniko Sanbor Shullai aganangaha. Iani bidingo kamrangko a·bachengatna dingtang dingtang a·jarango tom·anirangko dake chanchianirangko dakanggen aro NPP ni sakgni me·chik candidate rangni chee parliament-o bak ong·na ka·dongsoanikoba Shullai aganangaha.
Apsan daken re·anggipa sal somoirango Shillong seat na TMC nigita darangkoba seokgija NPP ni Ampareen Lyngdoh na chakpaaniko on·a miksonganikoba koborrangko man·soaha.
