NGH Bajengdoba Primary Health Centre (PHC) o doctor rang komie chu·ongjaenganiko janapate, Bajengdoba AHAM dolni President Kollingwat Sangma, songdongenggipa jinmani palo a·jani DC aro District Medical Health Officer (DMHO) na chitti see u·iatangaha.
Ia PHC ni ning·o man·gipa songrango songdonggipa manderang sak hajal 36 aro Asha rang chu·gimik sak 390 mang gnang ine chittio janapataha. Re·anggipa bilsio sak 2 doctor rangko kamo rakkigenchimoba, ia PHC ko da·o dipet doctor saksasan nirokenga aro iani a·sel biljime sae dongenggiparangna namen neng·nikaniko on·enga ine AHAM dolrang u·iatangaha. Songdongenggipa manderangni jelrorobaengani kri ia centre o sanna bannanio dakchakgiparang aro doctor rangkoba bang·bate nangenga ine AHAM dolrang janapataha.
Iani bidingo Medical Officer rango sing·sandie niangon, a·jao doctor rang chu·onggijani uamangni jako ong·ja maina doctor rangko kamna rimnapnagita uamang maming bil dongja ine aganangskaaha. Unbaksana NGH a·jaona jako ra·e kam ka·na seokatako man·genchimoba uamang WGH a·jaona transfer ra·e re·angani a·selo Physician ba dingtang dingtang a·damni specialist rang jekai gynaecologist, cardiologist, oncologist aro gipinrang bakrang dongjani gimin nama sanna bannaniko on·anio tang·onenga ineba aganangaha.
Indake ong·engon sanna bannani a·bao neng·nikanirangko chagrongenganina daitoko ra·e bil gnanggiparangko nirokatpachina aro NGH a·jao chu·ongagita doctor rangko watatpachina AHAM dolrang didiangaha.
