Lok Sabha election-o Garo Hills ni biapo NPP ni candidate Agatha Sangma na chakpaaniko on∙aniara, ma∙mong BJP ni NDA o bak donggipa partyna chakpaaniko on∙chinagita ge∙etanio pangchakesa NPP NDA ni bak ong∙ani gimin chakpaaniko on∙enga ine BJP ni State President Rikman G. Momin aganangaha. BJP dolni ia election-o NPP na chakpaaniko on∙anio uamangoniko maming man∙gnina dakengaa ong∙ja ineba Momin parakataha. Unbaksana ma∙mong BJP ni NPP dolna chakpaaniko on∙china ge∙etani kosako BJP dilgiparangni gisepo namnikgijanirang dongenga ingipa kattara kakketgijagipa ong∙a aro manderangna jajaanirangko ra·bajanagita, koborko parakattimgiparang an·tangtangni namgnina tol·e golporangko tarijachinagita mikrakataniko changsatai u·iatenga ineba Momin aganangaha.
BJP aro NPP dolni dilgiparang Shillong songjinmao gronggrikani ja·mano, April 7 tariko gnigipa changna Tura songjinmao tom·taie Agatha Sangma ko cheatna jotton ka·na nangarangni bidingo golpogrikanirangko dakangaha. Ia tom·anio BJP ni sakgni MDC Bernard Marak aro Benedict Marak baksana sak 300 mangna bate dilgipa aro party na kam ka·giparang bakko ra·angaha.
Ia apsan bakrime kam ka·aniara Prime Minister na on·gilanisa ong·aia jekon bilsi 10 na bate kamrangko ka∙baenga aro NDA candidate na pu·onaniara manderangni PM Narendra Modi o ka·donganiko bilakbatatni ong·a ine CM Conrad Sangmaba aganangaha.
