Mijal salo Tura, Spring Hills gittimoniko saknaa man·gipa Blue Whistling-Thrust do·oko Wildlife departmentrang ra·ange sanna bannaniko dakenggipa da·si wal 12:30 bajimango siaha ine Wildlife Division Tura ni Divisional Forest Officer R. K. Marak u·iatangaha. Ia do·oko Wildlife departmentrang ra·ange sanna bannaniko on·e nirok simsakaniko dakgenchimoba bilongbee saknaani a·selo janggiko naljokatna man·jaha ine koborna parakataha. Post mortem ka·e porikka ra·anio ia do·oni saknaa man·ani ja·pangde batdil goe nangani a·selo ong·aha ine u·iatangaha. Ia do·oni jat gimaroroangenggipa ong·ani gimin Wildlife Protection Act, 1972 ni Scheduled IV ni ning·o nisiatako man·janagita tarigimin niamo pangchake ripinge rakkienggipaba ong·a.
Batdilrangko jakkale do·o matrangko nisiataniko aro ripinggipa matburingko so·otjachina Wildlife department u·iatangan baksana mikkangchi indake niamni a·palo matburingrangko so·otaniko nikgenchimode, East aro West Garo Hills Wildlife Division-na kobor on·echinaba mikratanikoba on·angaha. Unbaksana do·o matrangni gamchataniko manderangna ma·siatna aro uarangko ripinge rakkiani bidingo talate on·a awareness program rangkoba ong·atna miksongenga ine Divisional Forest Officer parakangaha.
