North Garo Hills-ni Superintendent of Police, Bruno A. Sangmako ra∙gale Abraham T. Sangmako NGH ni SP ong·e jako ra·china Election Commission of India (ECI) ge∙etaniko dakangaha. Indake ECI ni rang·san ra·galchina ge·etaniara, saksa Social Activist Nilberth Ch. Marakni batanggimin somoio SP Bruno ni kosako adita ong·gijagipa kamrangko ka·aniko janapatan baksana, Tura Lok Sabha NPP-ni candidate Agatha A. Sangmani segipani boningtang ong∙a ine badi ka∙angani ja·mano ong·aha.
Ia badi ka∙anio pangchake Chief Electoral Officer (CEO), BDR Tiwari, 2nd Battalion Goeragre-ni Commandant Abraham T. Sangmako bakan North Garo Hills SP-ni kamko jako ra·chinagita ge·etangaha. Unbaksana Brunoko ra·gale Abraham ko NGH ni SP ni kamko jako ra·nagita rai on·aniko a·dok sorkari da·al attamni 5 bajina skang kamrangko matchotate Commission na watatna nanggen ine ECI ni Secretary Santosh Kumar Dubey u·iatangaha.
SP Bruno NGH ni Kharkutta songoni ong∙a aro ua batanggimin somoirango CM Conrad Sangmako an∙tangni dongchakram nokona okamataniko dakangaha jean model code of conduct ni dongimin niamrangko pe·aniba ong·a. Unbaksana South Garo Hills Gasuapara gita niamni a·palo bosturangko Bangladesh-ona salenggiparangko nirok simsakani pal batesa watrongenga ine Marak uni badi ka∙anio u·inagita man·angaha.
