Da·al salo NPP ni Agatha Sangma, Dadenggre aro Jengjal-o dal·begipa tom·bimonganiko ong·ate, manderangko ku·cholsan ong·e kam ka·na ku·monganiko on·angaha.
Ia chang Lok Sabha election-o gipin dolrangoni bang·a dilgipa aro ja·rikgiparang un baksa ku·mongna re·baenga ine Agatha Sangma aganangaha. Sangma, re·anggipa salrango Rongjeng-ona wenangani somoio gitcham dilgipani aganako janape, TMC aro Congress dolna pu·ongenchimode siangenggipa bolna chi ruaming apsanaigen indiba NPP na pu·ongenchimode bite gnanggipa bolna chi ruagita ong·gen ine aganangaha. Unbaksana, jatni pagipa P A. Sangma sianggenchimoba ua namgipa bol bite gnanggipako ge·e donangaha ine Sangma parakangaha.
Da·alo Meghalaya a·dok aro A·chik a·song, Chief Minister Conrad Sangma ni re·dilanio bilonggen dingtanganiko nikna man·enga. A·doko NPP dol chalaiengani gimin manderangni nanganirangko ma·mongona re·ange dabiena apsan party niko seokode kamrangko nambate ka·na man·ani gimin una cholko on·taichina Sangma mol·molangaha.
