Re·baenggipa Lok Sabha election-na March 16, 2024 tariko Chief Electoral Officer, New Delhi ni model code of conduct ko ra·gate pilak seokako man·gimin Flying Squad, Static Surveillance aro dingtang dingtang nirikkigipa dolrangko mande saksa hajal 50 na bate ra·bitaniko nirokchina ge·etangaha. Indake ong·genchimoba tangka paisarangko ra·bitaniko Garo Hills ni a·jarango name dake nirikkianiko dakjaenga ine saksa social activist aro Human Rights and Anti Corruption Youth Power of India ni District Secretary Flaming B. Marak manderangni suk ong·gija agananiko u·inagita man·e Chief Election Commission of India na chittiko see u·iatangaha.
Marak ni janapanigitade, Election Commission ni seokgimin Flying Squad aro Static Surveillance dolrang adita check point rango MLA, Cabinet Minister, Chief Minister, Deputy Chief Minister aro uamangni rakkigipa mande baksana warachakgipa pulis dolrangko name am·sandianiko dakjaenga ine u·iatangaha. Model code of conduct ni niamo pangchake ia election ni somoio darangkoba mikkang nitegija nirikkianiko dakgipa dolrang name am·sandina nanga maina bang·a campaign ka·anirango tangkarangko sualaniko niknagita man·enga ine Marak janapataha.
Ia election ko Garo Hills gimikni biaprangon tangka paisachi vote rangko breaniko bon·atna aro kakketo kragipa dilgipako manderang seokna man·agita nanggipa ja·kurangko de·e, nirikkigipa dolrangko sakantikon nambate am·sandianirangko dakchina District Administration ba Deputy Commissioner ko nirokatchina mol·molataha.
