A·dok Governor-ni ge·etanio pangchake, re·baenggipa Lok Sabha pu·onani salo sakantian name bakko ra·na man·agita, Meghalaya a·doko gimik sorkari officerang aro bidako pakwatchakram biaprangko April ni 19 tariko chipchinagita a·jani pilak District Magistrate rang ge·etaniko dakangaha. Apsan daken dal·dalgipa karkana ba Negotiable Instruments Act 1881 ni ning·o chalaienggipa company rang baksana dokanrang aro somoigita mande rakkie chalaigenggipa company rangko dongimin salo chipchinagita ge·etangaha.
Una agreba section 135 (B) of the Representation of the Peoples Act 1951, niamo pangchake salantio hajira kam ka·e cha·giparangna uamangni salantion man·a nangniko on·chinagitaba ge·etangaha. Ia kamko ka·anichi a·doko songdongenggipa sakantian an·tangtangni man·gniko gimaatna nanggija, on·gimin bilko jakkale kragipa memberko seokna chol on·agita a·dokni Governor ni didiani ong·a.
