Bilsi chu·ongkugijagipa me·chik bi·sa sakgniko, SWGH Chenga Benga songo mela ong·atgipaona re·angako ma·sina man·gijagipa manderang drae til·ekaha ine koborna parakataha.
Ampati thanao mokordoma ka·anio janapanigitade, April 17 tarikni attam 9:30 bajimangni somoio mela ong·gipa biapni sambao damgni a·sel ong·aha jeon skanggipa mokor domao, me·chik bi·sa saksa uni ripengska me·asa baksa re·angako ma·sina man·gijagipa manderang andalgipa biapo chadrape uamang sakgnikon sibokple doke sate saknaatani ja·mano mechik bi·sako til·ekaha ine a·jani SP Vikas Yadav u·iatangaha.
Minggipin apsan salon mokordoma ka·anioba me·chik bi·sa aro uni ripengska me·asakoba ua apsan biapon chadrape me·asako kae done, me·chikko dokgenchimoba sibokjae uamangni drae til·ekani bidingo tale u·inagita man·angskaaha.
Indake ia u·ina man·gijagipa dosiko dakgipa manderangara ua andalgipa biapo donge denggu dakna cholko ra·e donggiparang ong·na nanga ineba SP Yadav agandapangaha.
