South Garo Hills a·jani Wari chora biapni an·sengani aro nitoaniko nike, India a·songni dingtang dingtang a·dokrangni manderang nina re·batokenga. Ian Garo Hills ni tourism aro wilwilao songdongenggipa manderangna bang·a cholrangko ra·bae dakchakanikoba on·enga.
Ia biap mingsing minggamgipani bimungko man·genchimoba rona re·anggiparangni simsakgijani a·selo bang·a jeng jabolrangko galaniko nikna man·enga. Samtangtangko rongtale rakkie simsake donenggiparang indake manderangni skatang cha·a ringani bottle, plastic, lekka aro gipin jabolrangko galaniko nike uamangni suk ong·gijaniko social media rango parakataniko nikna man·enga.
Indake nitobegipa aro gun gnanggipa biaprangko rongtal an·tale rakkina nanganiko tourist rang ba ua biapona roanggipa manderang rongtal an·tale rakkichina u·iate uamangni suk ong·gijaniko parakatan baksana daitoko rakkichina mol·molangaha.
