District Level Inter School Athletics Meet 2024 kal·susaaniko Ampati songjinmani kal·chakram biapo SWGH a·jani Sports Officer aro Athletic Association bakrime salgnina ong·atangenba da·al salo name matchotangaha. Ia susaani skanggipa salo SWGH ni DC Hema Nayak mongsonggipa sokgipa ong·e susaaniko oprake on·angaha. Ia susaanio Garo Hills a·jani dam 21 skulni chatro chatrirang an·tangtangni changa sapaniko mesoke an·saobee bakko ra·angaha. Ian kal·susaanio gisiko nanggiparangko tang·doatna aro saksa sakgipin baksa ku·mong meligrike susanagita cholko on·agita miksonge ong·atangaha.
Bilsi 18 ni ning·o ong·gipa me·asa dolni kal·susaanio Good Samaritan English School skanggipa biapko man·an baksana apsan skulnin Sengkrip D. Sangma best athlete ni bimungko man·angaha aro gnigipa biapko St. Claret Higher Secondary School rang man·angskaaha. Apsan bilsini me·chik dolrangni kal·susaanio Soudarion Secondary School skanggipa biapko man·aha jeon Chatri Anisatinamony Ch. Marak nambatgipa ong·e best athlete ko man·aha aro gnigipa biapko Mellim Deficit Secondary School man·skaaha.
Bilsi 16 ni ning·o ong·gipa me·a bisarangni kal·susaanio Soudarion Secondary School skanggipa biapko man·aha jeon Sahil Koch nambate kal·anichi best athlete ko man·aha aro Mellim Deficit Secondary School gnigipa biapko man·skaaha. Me·chik bisarangni kal·susaanio Rangsakona Higher Secondary School skanggipa biapko man·e cheaha aro gnigipa biapko Good Samaritan English School man·angskaaha. Ia kal·susaanio Good Samaritan English School ni chatri Dondimchea A Marak Best Athlete title ko chenagita man·aha.
Bilsi 14 ni ning·o ong·gipa me·a bisarangni kal·susaanio Soudarion Secondary School changsatai skanggipa biapko man·taiaha aro Mellim Deficit Secondary School gnigipa biapko man·skaaha. Ia kalsusaanio Mellim Deficit Secondary Schoo ni Daldrobath D. Marak nambate kal·susagipani bimungko man·aha. Apsan daken me·chik bisarangni kal·susaanio Good Samaritan English School skanggipa biapko chetaina man·aha aro gnigipa biapko St. Claret Higher Secondary School che·angha aro Hegami D. Sangma best athlete bimungko man·angaha.
Bon·kame kal·susaanirangko mat·chotani ja·man Soudarion Secondary School chu·gimiko nambatgipa ong·aha jeon uamangni gisik nanganiko aro bimchipaniko niknagita man·aha aro Soudarion Secondary School gnigipa biapko man·e uamangni gisiko nanganiko mesokangaha. Ia District Level Inter School Athletics Meet 2024 ko ong·ataniara chadamberang an·tangtangni changa sapaniko, bakrime ku·monganiko aro bimchipaniko mesokna mingsa chol ong·a.
