Dumper truck garirangni ta∙rakbee aro simsakgija salanichi, Garo Hills-ni manderang bang∙a a∙selrango jang·nanganiko niknagita man∙angaha. Ia a∙sel ong∙aoniko champengnagita dingtang dingtang NGO dolrang rang jekai AYWO, ADE, GSMC, GSU Interim Body, FKJGP aro Tura ni Social Activist-rang uamangni namnikgijaniko mesoknagita DC office-o da∙al tom∙dakangaha.
Ia obostarang changni chang ong∙engani gimin truck garirangko dingtangmancha re·ani somoiko done, salni somoio re·na dona on∙jan baksana driver-rangni ta∙rakbee salaniko champengatna aro nirokatchinagita DC ko mol∙molangaha.
Re∙anggipa somoio, Tura Ballonggre-o me∙chik bi∙sa sakgnini scooty salangmitingko dumper truck garini salpakanganichi uamang bilongen saknaaniko man∙angaha jeon saksa me∙chik bi∙sa ja∙a samsako gimaataona sokaha. Apsan daken mijal salni bakoba bike salgipa Rakseng M. Sangma-koba dumper truck salpakange a∙sel ong∙aona sokaha jeon ua uni ja∙ao bilongbee saknaaniko man∙aha.
