East Garo Hills-ni Samanda Kakwa, Simsang chibimaoniko MP Agarwal Private Limited Company-ni niamgri an·cheng bikotanina APA dolrang District Forest and Environment Officer-na chittiko sedoataha.
Garo Hills-ni pilak biaprangon da·ororo ding·anirang batrikrike kona noksikrango chiringrangni ran·angani a·selo china dilanirangko niknagita man·enga. Indake Company-rangni mingsingbegipa Simsang chibimako nosto ka·anian bang·a gimaanirangko ra·baenga. Batanggimin salrangoba Bangon chibimaoniko niamgri an·chengrangko bikotanina APA dolrang mikrakataniko on·ataha. Uamang PMGSY ramarangko tarianioba Garo Hills-ni ong·telaigipa gamjinrangko nosto ka·esa rika cho·anirangko dake kamrangko matchotatna jotton ka·enga ine APA dolrang aganangaha.
Ia apsan Company-kon Chokpot jolo songdongenggipa manderang uamangni niamgri chiringrangoniko an·chengrangko bikote an·tangtangni tarienggipa ramarangna jakkalanirangna matnange aganangaha. Indake niamgri ong·telaigipa gamjinrangko nosto ka·anian an·chingni buring bolgrimrangko aro samtangtangko nisiataniona ra·baenga. Ia kamrangko ta·rake champengna man·a gita niamgri an·cheng bikotanirangko dontongatchina aro ta·raken nirokanirangko dake Company-ni kosako raka sinjetanirangko on·china gita APA-dolni President Francis Marak mol·molaniko dakangaha.
