Shillong, Laitumkrah-o donge SPBL Energy Pvt Ltd. o kam ka·enggipa A·chik me·chik saksako, SPBL ni Director Somendra Mehta kragija dake kal·akna jotton ka·anina uni kosako mokordoma ka·doangaha. Ua Guwahati-o tom·ani donga ine tol·e okamate uni dongchakgipa Radison Blu hotel-ni kutturiona okamate kragija kattarangko agane aro ong·gija kamrangko ka·na ge·ete kal·akna am·aha ine mokordoma ka·anio parakataha.
Apsan daken gnigipa changoba tom·ani donga ine pa·sikate Shillong-ni Courtyard Marriot hotel-ona okamatako man·e re·angon, kutturiona rimnapna jotton ka·aha jeon me·chik jechakaha aro hotel-oni bakan re·baaha ine u·iataha.
Gittamgipa chango Tura-o May 1 aro 2 tariko MePDCL baksa tom·ani ja·mano apsan daken Agillanggre-o tom·ani dongtaia ine dongrikna aganaha. Ia chango unbaksa uni ka·rimska saksakoba rimange uamang sakgnikon maming u·iatagri joljol C&C hotel-ni kutturiona rimange kal·akna jotton ka·aha ine janapataha. Ia ong·a obostani ja·man Director baksa kattarangchi uamang namen jegrikaha aro hotel-oni re·bae Tura MePDCL ni dal·batgipana iani bidingo janapeaha ine u·iataha.
Ia ong·a obostako chagronggipa uni mokordoma ka·anio kakketgipa a·selko name sing·sandie dosi donggipani kosako kragipa sastiko on·china didianga.
