North Shillong-ni VPP-ni dilgipa Adelbert Nongrum Mongolbar salo, Reservation Policy baksa Roster System meligrikgijanirang ong∙enga ine aganaha. June jani 14 tariko Reservation Roster ni gital Office Memorandum (OM) on∙gipao parakatani gitade, Reservation Policy baksa Roster ni meligrikgijanirang ong∙engani gimin, Roster System Resolution, 1972 ko gital daktaina nanga ong∙jaode namdapatna nanga ine ua janape aganangaha.
‘A. Quantum of Reservation’ niamni gitade, Office Memorandum-ara gimik kamrangko a∙kangani ong∙a, indiba 1972-ni Resolution ara bangbang ong∙enggipa kamrangko a∙kanganisa ong∙engani gimin Roster aro Reservation Policy meligrikna man∙jaenga ine ua aganaha.
B. Principles to be followed in preparation of Reservation Roster’ at para B.4. o seani gitade Roster ko chu∙sokatna bangbanggipa biaprangko donna nangja, indiba niamo pangchake gapatna nanga ine ua dabiangaha aro segimin niamko maming orto gri den∙e galaha ineba ua agandapaha.
Dingtang dingtang sorkarini departmentrang aro office rang batanggimin bilsi sao kamna ra∙napaniko see donaniko aro bangbanggipa ong∙e dongenggipa kam rangkoba nianiko dakangaha ine Nongrum aganaha.
District level aro Sub-Divisional level chu∙gimik 80% reservation ko Khasi-Jaintia jatna chamanio Jowai aro Shillongnasan ong∙aigija Khasi Hills, Jaintia Hills aro Ri-Bhoi gimik a∙jarang apsan man∙agita nanga ine Nongrum agandapaha.